Pipica Novi foji, broj 52 25.7.2007 10:28

Dobro da se je torno stori, novi podeštot

Teplina je trdo vela, tako da i poli normalnega šloveka mozak slabo dela, a kamoli neće poli jenaga pulaštra. Šjor Čakić me tira da ca prvo napišem pađinu, a materiji je se manje. Eko dobro da se je torno stori, novi podeštot, pa će mi malo on pomoć, koliko son cu, puno njimi je drugo da je priša opet nazat va naš kort, perke je Pul zonjega bi previše veli grod i tamo je bi malo zgubljen, magari zveću ploću.

DEMETLIKA
Ima i on difeti kako saki drugi, ali krh ni voda. Doma je doma. Za poć va Pul mu je trebalo vijađ plačevat, a od Presiki je moga i na nogi prit na delo, ali Boh je veli da je napravi ta škerac. Kuntenti će bit i alijuni od Manzana, perke hi pježo kako lipo talijunski govori. Sinjol kad se je torno bi reć da ima za finit još tega ca je obećo, sama ako ni zobi. Receju da je skleroza najlepca bol, niš ne boli, a sako toliko nešto novega cuješ. Neće mu bit lahko delat va Labine i va Pule, i se to za jenu ploću od Groda. Ca mu vi vervate?

Pero, dobro je imet naši ljudi na teh većeh pozicionah, kako ca su on, Brkarić, Poropat, perke vajka vide i cuju nešto ca mi nanke ne znomo. Samo tako moreju nešto naškrnjat za noš kroj. Seda neki don son vide šinjora Demetliku i Ružića, prešidenta od općini Pićon, skupa va oštarije. Magari se govori i je pisalo da ne redu juko dekordo. Ki ga je njemu klo ne znon, ali Demetlika je ime veće oci, a Ružić veću brodu.

Kad son već poli Ružića, se mi se paro da na ono bondo prema Uške neki cudan vetar puše. Pocelo je kuhat va Kršane, a sada je zakuhalo anke va Pićne. Pićonci su trdo dobri za brojdi i kampanju delat, pa bi horši za nekeh bilo bolje da se ne mešaju va politiku, perke od tega je malo koristi. Zaboli glova, a kampanja pati.

Je prišla šinjora va farmaciju pitat antibebi tableti za glovo. „Šinjora moja, to van ni za glovo". „Ja iman tri kćerki, sake don jenu tabletu i mene ne boli glova".

Puno vremena neson niš piso za penzjonati, senjol da nin je trdo dobro kad niš ne kontreštivaju. Novemi so seda krešili penzjon dvisto i tristi kun, ca ni puno, ali va te mižerije dobro pride. Pomalo pridevaju izbori i s ten su pomalo poceli kupevat voti od penzionati. Zato ki ima cu, neka se pošne već seda trdo škrinjat, perke kad su nekega potrebni nojdu šoldi i tamo kede hi ni. Kad penzjonato zgubi dentjiru i to kuštu.

Prišla je šinjora poli dentišta, sukla budonti i dignula nogi vajer. „Skužojte, ma vi niste poli ginekologa". „Doktor, skužojte mojemu mužu ste klali dentjiru, a sada je vinite vonka".

TURISTI
Turisti je se više i više i fala Bogu da na đirinah imaju mesta koliko ćete. Labinjanima su klali rampi na saken korake, tako da moreju uć plavat samo na Đirandelu prvo osan ur jutro ili po noće. Po mojen da malo zašpuraju delovcami, bi in bilo najbolje klas jednu rampu va Labine  na krožire za Rabac. Provi Repenjani i Rapcani si poznojo, perke ih je trdo malo, a drugi lipo neka si plaćevaju da bi mogli videt bokon našega lepega mora. Ako ne. neka zamu kondoćol i redu na Forticu. Delavci ki delaju va Rrapce moreju i dole spat, perke hi je se manje, tako da će turistami vajka bit pod ruku. Je reka jedon maještar ka dela va škole za kuhari i kameljeri da će morat poć va Slavoniju delat, perke tuka nima više kega vadit.

Već kad ne hode plavat kako prvo, Labinjani se pomalo tornjevaju feštami. Kad se lipo organizu placa va Storen grode će vajka bit puna. Posebno lipo je bilo seda kad su bile klapi, zato saka cos Vozile i semi ki su mu pomogli, perke nešto takovega ni bilo puno let va Labine. Štajun je od feštah, pa će tako na cetiri osmega bit vela fešta poli Snašić, dvajsti peta po rede, Pipica dvo miljara i sedme. Pozivan si moji pulaštri, doma i po svite, da se jove na srebrni pir. Na velu žalost zgubili smo još jenega pretela od fešti, našeg Livija. Verva son da ću ga i to leto dobit jedon punat na moru, ali ostat će da son ga zadnji put dobi dvo miljara i šeste.

Jenu veselu za kroj da zobite na teplinu. Mići je ćepo mater i oca va fadige. „Ćaća, daj mi deset kun!". „Ca propjo seda?" „Sused mi vajka do kad ga ćepun z mamu va pustelje". Ako ne morete poć na more, tućojte nogi va kadine. Držite se hloda.

Vaš PIPICA