Pipica Novi foji, broj 53 30.8.2007 10:48
Krešili su nan kruh, a još malo će i mliko
Bipo moj, znoš ca si ti kad se trdo lipo opereš. Vero ne znon. Cisti štupidin.Bi reć, da se si mi previše na gusto peremo kad trpimo neke stvora. Krešili su nan kruh, a još malo će i mliko. Jedini ni reka nanke besedi, kako da je to normalno. Za mliko rivon anke kapit, perke smo goveda, vosce i kozi diboto zatrli, pa nan zato anke boški goriju. Kozi i vosce su bili kanaderi na tle, perke ospoda grmah ni bilo co goret.
Ministri i političari so se pogubili va svojemi viletami blizu mora, a neki va hotelah keh forši plaćevaju, a najbrže ne. Poli nas je na velu žalost fameji ke ne moreju saki don poć plavat va Rabac i okolicu, perke i za to trebaju lepi šoldi, a kamoli poć šetimono don va hotel. Zapamtite ca ću van zapisat. Valje će se ministri i političari tornat s ferjah, kede nin je mozak malo opocinu. Magari ni ime od cega i lipo će pred izbori obećivat kako će kruh kalat. Znojte, ako bude kalo, će kalat deset, dvajsti lip, a kreši je jenu kunu i tako će van opet oci zablatit.
Dokle oni opocivaju, inspetori so se rashitali po Istrije kako kragulji. Pišu multi i to baštanca vele za saku pikulecu. Ja bi radi da šjor Kajin i Poropat pitaju oneh va Zagrebe keda su zadnji put poslali inspetori va Sanaderovu Dalmuciju i malo niže. Tamo ne smiju nanke pounjat, a kamoli multi pisat. Jedon mi je reka da je dole vide kako deca od deset let prodavaju fruti i rakiju poli some cesti. Turisti va privatneh kućah na crno je mirakuli, a poli nas moraš i brata prijuvit. Ja znon da treba bit rida, ali onda neka bude za seh sejno.
KONTI
Dole su sigurno i preci na feštah puno manje nego poli nas. To leto su fešti puno bolje organizane i zato prideva se više ljudi. Dve stvore se ne kambjevaju. Po dvi tri fešti su sejni don i preci baštanca veli. Kako su mi rekli, na jenen meste na fešte va Storen grode trebalo je dat dvajsti pet kun za porcjon sardeli. Za ti šoldi morete va Zagrebe kupit dve kila freškeh sardil, a Labine samo kilu, perke je Labin previše dugo od mora.
Ljudi se pitaju, ca bi reć da je na kontah na Dubrove sako leto se manje naroda. Na velu žalost većinu mlodeh to ne intereso, a to bi se trebalo malo i va školah zamislit, a saka cos škole Matija Vlačić i škole va Raše. Pero nanke stareji se više joko ne prekidaju da pridu. Ni vrah da hi naše domoće konti i tanac se manje pježojo. Bili su anke kantadori, sopci i balonci od cile Istri, a njih je bilo diboto više nego oneh ki su to prišli posluhat i gledat. Da Bosanci organizojo nešto njihovo domoće na Dubrove, vervan da bi hi bilo koko bravinoc.
Na kontah jedon stareji šlovek me pita joli znon zoc penzionati smrdiju. Perke imaju krepanu stvor med nogami. To se tice storeh, perke je dosta mlodeh ki so još vajka kapoca.
To leto se je moglo videt da je i našeh Merikani manje doma nego lone. Je oneh ki pridevaju sako leto, ali je i poli njih oneh ki moraju malo stisnut. Dolar ni onoko jok kako ca je bi let nazad, pa se ne moreju rashićivat kako prvo. Pero saka nin cos. Sako leto neki naši mužičisti redu na njihov račun va Meriku i kako receju ne fali nin nanke mliko od tića. Pred dvajsetak don me je razveselila jena naša lepa mloda ka živije va Merike. Prišla me je noć na recepcjon va hotele da vidi tu Pipicu va živo, perke je trdo pježo kako pišen. Se srhi su me pasali i propjo bin radi da mi se kaput jovi preko interneta.
KOSIĆ OT AUSTRALIJE
Joli vi znote koliko treba Kosiću da dokreleto va Labin od Australiji. Puneh tristi dve leta. Eko sada ti dnevi je priša jedon Kosić, ali mi nisu teli reć koko se zove. Horši su imeli stroha da ga nebin ćepo pod robulu. Pero je napravi jeno trdo lepu figuru. Je spravi si Kosići od njegoveg njezla, njih poli dvadesetak i napravi trdo lepu feštu poli Dineta na Brige. Saka mu cos, ali ako mu bude trebalo toliko lit da se torno va Australiju ne znon koko će rivat.
Ljudi moji, vi ki ste po svite pridevajte doma ako bilo kako morete, perke rodbini i oneh keh poznote saki don je se manje. Zato mi držimo feštu Pipica kede je pasalo našeh ljudi od cilega sveta. Fala onemi ki su nan preko interneta čestitali srebrni pir valje od Sidneja va Australije. Drogo mi je da se je jovila i moja bivša suseda od Bremena, a to van je na somen vrhe Nemčiji i vervan da ćemo se dalje videt.
Za kroj ću Vam pravit kako morete lepi šoldi natuć, pa nećete puno glovo razbijat ca je kruh kreši. Bipo je opra kažin, pero nikako ni moga noć ženske ke bi nutra delale. Toni mu govori neka za pocetak on dela, pa će horši prit kuletini. Pokle mesec don ga pita Tone kako re delo. Pusti me ća nanke prdnut ne moren od dela.
Vaš PIPICA