Pipica Novi foji, broj 55 26.10.2007 17:15
Anke diretori va Rapce delaju puno više nego prvo
Leto je pasalo, a jesen pomalo lovi điri, a kako je počelo bi reć da će bit hludneja nego lone, tako da će trebat pošnet raneje ložit. Hoteli se pomalo zaperaju. Delovci ca su delali samo po lete hode pomalo doma tako da će hi seda bit još više bez dela. Bili su mušni i puno su delali teh por meseci. Stu dibulu ploću nisu rivali nic zašpurat. Dobro ako su rivali prit na nic na one makine ka hita šoldi. Da su njimi rivali litratat one karteli za digevat šoldi koko onemi va Pule, ne vervan da bi se juko pomogli. Zato ni cudno da se tako nešto ni nikad va Labine trefilo, perke oni gredu tamo kede je šoldi, a Labin ni taisti, magari je za puno stvora draži od Puli.
Treba bit pošten i napisat da anke diretori va Rapce delaju puno više nego prvo. Pridevaju jutro i tornivaju vecer, pero kad dobiju lepu ploću zobe na se, anke na ploći od delovci. Turisti su bili kuntenti, pero med njimi je picigasteh, ki će vajka nešto noć. Najškifeje od sega mi je kad receju da je jes dobro, pero vajka sejno. Da je dvajsti don va hotele saki don bi moga nešto drugo vibrat. Da mi je videt Labinjana ka na sedan ur jutro ji pancetu i kobasice, a oni se ne rivoju donajes.
Bin ote da jedon put pridu stareji Labinjani va hotel na pocetke i na kraje sezoni i da vide storci ki pridevaju od Nemciji i Franciji. To su turisti manje-više stareji od sedandeset let. Nojdu se tuka i lepe mlode med šesdeset i sedandeset let. Pasoju preko miljor kilometri i rivoju saki don na điti hodit, a na vecer toncat i kantat, pa receju mužičisti da nin je najlepce sos kad oni pridu. Znon da oni imaju veći penžjoni, pa moreju bit veseleji, pero kad se za naši penžjonati organizudu fešti i điti za mići šoldi trdo malo hi se jovi.
Je tuka Nemcah ki su forši bili va Jugoslavije koko salduti va gvire, pa su prišli još jedon put videt kede su hi partizani sprušili. Partizani skrijeni va boške poli jenega puta cekali su Nemci da pasuju. Puški i mitralji bile su pronte za hitat. Pasala ura dve, a Nemci nidere. «Ca bi reć da hi ni, sigurno nin se co trefilo po pute», govori Bepo Tonetu.
Finalmente je prišlo vrime da turisti ne fole samo lepe spjađi i cisto more, nego i se okolo. Semi treba bit drogo da je Rabac dobi Blu rožicu koko najlepce uređeno mesto na Jadrane. To je sigurno prišlo va prove ruki, perke pogledat Rabac por lit nazad ili denas, to je koko don i noć. To treba zafolit turističke zajednice, Grodo i gospodorami od hotelah. Turisti nimaju više co govorit da kamo hodi tasa ko plaćevaju, da nimaju nanke bankini za ses i malo opocinut. Jenemu trubetu ni bilo na mot da je Rabac to dobi, pa je drugi don pošuro zidi poli pošti, a na velu žalost još je oneh ki krodu rožice po đardinah.
Nemojmo mislit da je se finjeno. Bokun od Primorja napred koko da nima gospodora. Lit i lit vajka je sejno, veli bošak, a put od dolenje kontru gorenje cesti ima škalini samo na pocetke i na kraje, a med da vas Bog sacuva. Turisti dosta onuda hode, pa bi bilo lipo da se i to fini. Šperojmo se da će pokle te lepe nagradi i to prit na red.
Ću van hitit jenu šćuricu prvo nego se prehitin na nešto drugo. Pridu Bepo i Tone va Sarajevo i farmojo se poli jene oštariji kede je bi veli konfužjon. Bepo se je zalete nutra perke je misli da davaju nešto za nic. Brzo je priša vonka sa okrvovljen i pun crnjoki. «Nanke ni vela fila, zajno si na rede», je reka.
Ne znon jo li ste vi šli za ten, dosta vremena se more trdo malo prelejit o temu ca se dela va palace od Storega groda. Od keda su klali novi barkoni malo tega pride vonka. Sigurno se trdo prontevaju za novi izbori. Zato nova fabrika na Pićonštine dimi na por kolori. Dok pošneju normalno delat se će potrovat koko elektrani va Plomine. Pogledajte samo koliko je doseda samo va ten lete pomrlo mlodeh ljudi va Labine, a to ni bez vraga.
Za kroj ću hitit jeno oko na internet. Drogo mi je da smo se rivali kapit pokle zadnjeh Fojah. Vi pomorite mene, a ja ću von da prelejite kokovu štupidecu. Znon da neku šćoricu ili co drugo napišen dvo puti. Neki don ne znon ca son ubedva, a kamoli ca son napiso va Foji por numeri nazad. Fala semi ca ste se jovili, a lepo je napisala šinjora Anđela. Kvarnor lit je va Merike, pero misli i srce su tuka. Deca Pireja, von ću por besedi o Pipice pisat drugi put. Vi ki ste po svite pišite mi co lepega, ca se je poli vas trefilo tako da moren nešto i o vami napisat.
Ne moren finit bez šćorice. Bepetu je umrla tašća i on se je sa kuntenat zaputi kupit rožice za zadni put. «Ćete široko ili usko kordelo?» «Zoc me pitate?» «Koko ste kega jimeli trdo radi kordela je široka kone uža.» «Šinjora, imate forši malo crnega konca...»
Vajka svami vaš PIPICA