Pipica Novi foji, broj 56 21.11.2007 8:52
Poli nas je najviše leveh, a od teh ni vele koristi
Priden doma i nojden depešu od Čakića. Pipica pošni pisat perke će Novi Foji ta put poć vonka malo raneje. Nanke sekundi mi ni trebalo i zajno son zno da je to sporadi izbori i ni lahko na prešo co pametnega napisat. Fala Bogu, ja se vajka mešan med ljudi i dosta njih je reklo, ako nimaš co pametnega pisat, napiši nešto o izborima. Ca je tu je, izbori su nan na vrotah, a naši ljudi su trdo malo zainteresani. Koliko cujen ti mlaji nimaju nanke intencijona poć votat.
Si govore, preveć šoldi će se špendat, a trdo malo tega će se kambjat. Ca ne bi bilo bolje da ti šoldi špendoju va kampanji, a ne na kampanji za izbori. Nesmo toliko bogati da se hitamo šoldami, a na druge bonde kreševaju kruh i mliko, ca će najviše siromaheh zadet. Pero oni za to ne razbijajo juko glovo. Manje više se su to ljudi keh gledamo već toliko let, pa su lepo mogli zet indigo, se bi to puno manje kuštalo. Va te cetire leta, a neki anke više, neso se mrvi postarali, samo su dobili ka suri ili ko kilo više. Ženi hi ne jode perke znojo da će doma dones lepe ploći i da će spat z bogaten penzjonaton.
LEVI I DESNI
Pune su hi televiziji, đornali, na radije, po ceste, tako anke da ćete ne moru van uć. Za obećat su trdo provi, a kad treba to napravit nihi nidere, pero sejno na mire spiju perke znoju da nin jedini nic ne more. Pride mi se za posrat kad neki od njih receju da hi ne intereso ploća va Sabore i penzijon pokle tega. Ako je već tako neka ti šoldi podele onemi kemu su trdo potrebni, a teh je juko puno.
Bipo je brusi udovicu, pero ga je intereso i njejni penzijon. Na pol partidi ga je shiti koko zmaci. „Seda se moreš i posrat, pero nikad nećeš brusit koko moj pokojni." Zato lepi moji političari nemojte obećevat po napred, a somi znote da to ne morete napravit.
Puno od vas govori da će za leto dve trdo malo ljudi bit bez dela. Kamo ćete spravit oneh ki so finili kvarnor i pet,šes let, a jedini hi neće na delo, a za oneh preko pedeset nanke govorit.
Kontro cijo Haso od Presiki provega Mujeta od Šumbera. „Cujen da išćeš delo, forši biš moga zome delat." „Ca got ćeš", govori Mujo. „Ben kad je tako ti ćeš ga humat, a ja ću pobirat šoldi na kase". Koliko će Mujo bit kuntenat ne znon, pero da je cijo Haso bi zbujen i pobira šoldi od nas ki smo pohumali se ono ca su nan obećali, vervan da bi ime još veću kućerinu od one ca ima seda va Presike.
VOTI
Za kega votat pitaju se ljudi. Sadere po svete manje više su levi i desni. Poli nas je najviše leveh, a od teh ni vele koristi. Šjor Kain je najviše pešto va Sabore, a oni okolo njega su bili gluhi ili ga neso rivali kapit. Malo son zosto kad son prešte da je i naš Poropat bi zbunjen, perke na televizjone su ga trdo malo pokuzali. Bi reć da je bi previše lep za onu kompaniju.
Ljudi moji, hote votat i vervan da nećete žbaljat. Neson od oneh da pišen za kega bi trebalo votat, pero znojte da nas puno od njeh preko Učki nima nanke mrvi radi. Kako će nan bit pokle tega čina, ne vervan više jedinemu. Najviše vervan decami, pa ću seda napisat por besedi za decu Pireja ki su oteli nešto prelejit od Pipice.
Kako son dobi ime to son već piso, pero za vas ću napisat još jedon put. Kad son bi mići, poli nas va Viletah si smo držali kokoši. Poli mojeh dvorićah vajka smo delali kućice i igrali na šćinki i si su govorili, remo se igrat poli Darjetovih pipica. Priša je don kad je prideva Tito, prešident od Jugoslaviji va Labin, a to van je bilo koko da Bog prideva. Dvorići i pipice je trebalo dešvat, tako da smo saki don jali juhu i meso od kokoši. Pero jena pipica se je rivala šalvat i ona don danas kreleto po Labine. Jedon son od retkeh ka nima telefonin od žepa i patent za vituru. Lipo Vas molin ki je vide pipico da peljo i drži telefonin. Munjen son za maškari i zato se držin Folšariji. Deca Pireja, budite mi zdravi i veseli i drogo mi je ca ste se jovili.
BALUN
Ritko pišen o sporte, pero kako son balun igro puno let, neke stvora ke su se trefile va zadnje vreme propjo me ne pježojo. Kovarima va zadnje vrime propjo ne hodi, pero grdo je cut po barićah i na markate da su dvo đogadora prodali partidi. Jedon i drugi su puno doli za Rudar i ni va rede da se tako za njeh govori. Se je lepo kad dobro hodi, treba bit jok i kad re malo slabeje. Cementu je por let slabo hodilo. Poglejte hi seda, osomnajst partidi de fila neso zgubili. Tako je baren zgledalo. Mi smo kantali pokle sake partidi, a neki put i prvo partidi, zato mladići više valjo dobra kompanija nego se drugo.
Zadnji put son piso da je teško naspravit penzjonati za fešti. Neki mi je jovi da son slabo informon. Forši son, ja ću krivu bondu, pero trdo mi je drogo da fešti za penzjonati bude ca više.
Ca ćemo za kroj ako ne jeno šćoricu. Lucete je umra muž. Kum je poce zajno tentat poli nje. „Ca si munjen, siromah se ni nanke ohlodi, a ti me već potežeš va pustelju". Na kraje sejno je cedila. „Moremo se poć brusit, pero pomalo i žalosno", govori Luce.
Sako dobro Vaš PIPICA