Pipica Novi foji, broj 57 20.12.2007 12:47
Političari se dogonivaju ki će s ken poć koko kurbi
Lepo su nan ga klali. Veli šoldi su si skupa špendali, a ca su nan prežentali. Veći preci na se bondi, a oni se natežu ki će zet komandu va ruki i ako bude maj moguće, još više će nas vrit hitit. Ne znon koko se moreju nanke va zrcalo pogledat. Lažu nas na se bondi, pa hi more seh skupa sron bit. Seda se dogonaju ki će s ken poć koko kurbi. Nude šoldi i zemlju jeni drugemi kako da je to njihovo. Lahko je s tujen po groje tuć.
Cigon ni puno ceka, on se je zajno dogono perke on je i z mićen kuntenat. Pero por pora išće, a tuka nisu joko dugo. Jeni i drugi gledaju šloveka va oci pa mu ga klodu. Kako će to čine finit neznon, pero non se ne piše nanke mrvi dobrega. IDS se ta put ni nanke mrvi pokuzo. Od kozi su prišli kozlići, a to ni dobro.
Još malo će nan i more prodat samo da bi šli va Evropu, od ke ćemo imet više škodi nego koristi. Zato ako sada ne budemo zbujeni, noć će nas brzo pojes. Bit ćemo hlopci na svojen, a na velu žalost to smo već na pol. Držimo trdo do svojega, perke vrag ne spi, a kad spi njegova je mat va piđame na barkone. Neki su ti don dobili uru i diplomu ca su doli krv više puti. Som sobon son se zapito ca njimi nisu ti vragi rivali krv popit.
Drogo mi je kad kontron nekega na škerac, ako niš baren se malo nasmijimo i štupidorimo. Tako son nalete na Valtera Poština ka gre opet va Meriku razveselit naši, na pol Merikani. „Pipica, kako prsti keh si bi deboto raspili?", pito me je. „Vero dobro, pero cujen malo bravinci kad se vrme kambjeva", son mu reka. „Kladi ti blizu prstah malo cukara pa će forši bravinci portit na cukar", re reka Poštin i lepo porti z motorinon, ne va Meriku, nego poštu nosit.
PENŽJONATI
Mujo od Šumbera torneva cijetu Hasetu od Presiki: Pretelo Haso, reci ti mene ka je diferenca met curinon i loprana? Haso sa vesel govori: lopran kad se digne se je manji, a curin kad se digne se je veći. Bravo, govori Mujo od Šumbera, pero tuka je još jena diferenca, za poć na lopran moraš poć va Pul, a na moj curin moreš poć zajno.
Vidite kako se more zašporat na benzine ka sako toliko kreševa, a forši bit anke kuntenat. Vervan da mu cijo Haso neće zostat dužan. Zato non neće zostat dužna Elektroistra, pa će nan lepo krešit korent, kako govore tristi posto perke nimaju šoldi za Božićnicu i špežu ko dobivaju saki mesec. Pošnite kupevat kandeli i petrolje, perke neće dugo pasat da će vragi i to krešit.
Lepo je cut da će penžjonati od Groda dobit sto kun za Božić. Lipo vas molin, nemojte se preveć hitat, a najviše vi ki imate veli penžjoni perke vi ne znote z šoldami delat. Pustite da van nešto od teh sto kun zostone za drugo leto.
Bipeta penžjonata je ćepala želja za brusit jušto na Novo leto: Marija je šo nutra? Vero ni! Ma ca je šo poli vraga finit! Kamo ćemo mi finit drugo leto, pena ćemo videt. Verdur, kruh, mleko... se je krešilo preko deset posto, a sindikati se tuceju kako bi ploći krešili s cetiri na pet posto. Kako prontevaju, malo će bit oneh ki će poć va penzijon bez palicah. Ca je misli šinjor Hrelja, kapo od penzjonati, kad se je klo na bondu od oneh ki su hi trdo pokrali i nikad neće tornat ono ca su zeli. Najhuje od sega, puno njimi su zdrovlje pojali, a to se na velu žalost ne more nikad tornat.
LABIN STAN
Ako niš, ti dnevi su baren slinovci kuntenti. Paseva Sveti Mikula i Nono Mraz, i sakemu neki regol donese. Sveti Mikula mi se potuži da je bilo trdo malo marinaji na prve maše va crekve na Katurah ka nosi njegovo ime. Repenjanima koko i vajka, saka cos. Lepo je videt grod kako nan svetli pred Božić i Novo Leto, magari to nekega ne komodo. Lepo bi bilo, kad već hitaju toliko šoldi za klas kamenja na ona zid kontra cimitaru, da naprave jenu kućicu poli cimitara, tako da se ljudi imaju kamo skrit dok cekaju korjeru kada doš pada. Za neke stvora ni šoldi, a na druge bonde se hita bez potrebi. Pokle diboto sedandeset let, va Viletah kladevaju kućni red za dve fameji, a gore piše kako da stojimo va nebodere. Se to mi plaćevamo, a kad treba ca napravit šoldi nidere. Bilo bi lepo da se ljudima rece kamo gredu šoldi ki se saki mesec plaćevaju Labin stanu, perke puno labinjani to pita. Ako ne plaćevaš va hip si na sude.
Blagdani su tuka i neka se saki rashita kako zno i umije, pero ne treba saki šoldin špendat koko da će prit sud od sveta. Već je poce kažin po butegah. Na vrotah od Midasa inbati Sipe žensko ka je hodila vonka, i kako neso mogli nabot pasat, tohne je z lahton va cice. Siromah se je poce skuževat na se fozi, a samica samo muci. „Šinjorica moja ko imate srce mehko koko sasci, jur ćete mi prostit". „Vero ćun, ko van je ona stvor trda koko lakat".
Za kroj tega leta semi skupa, doma i po svete želin sretan Božić i Novo Leto, i puno zdrovlja, a ako je zdrovlja forši će anke ona stvor bit trda koko lakat.
Vaš PIPICA