Pipica Novi foji, broj 62 2.6.2008 13:37
Z loprana se vidi kada je nogometna partida namešćena
Više puti se pitan, kade smo, koko smo? Vrite smo, miljor posto, a napred hodimo trdo vajngajoć. Šinjora ka je preštela mojo zadnjo pađino va Fojah bobić me je špotala da neson niš kritiko. Pokle je đornalista od Glasa Istri Marjano Milevoj šo va penzijon, bi reć da nekemi to fali, a puno je njih bilo ki so pljuvali po njemu ošto samo kritiko, a trdo malo foli. Marjano saka ti cos. Uživaj va penzione, piši libreti koko do sada i ko je maj moguće po domoće.
NAMEŠTENA PARTIDA
Sada ću se malo mešat va pađino od Remzeta ili Renca Zahtile, koko so ga Labinjani zvoli kat je bi va rukomete. Neka mi škužo, ali neke stvori bin ote anka ja napisat za ta šport, koko ga Hrvoti zovejo. Remzo, ti napiši po domoće ca got ćeš, ja ti neću zamerit. Ljudi moji, to je vela tuga i nevolja ku ste prišli na ove zadnje partidi na kampo od Rudara. Sacega se je govorilo: partida je nameštena, ponapred je prodana...
Vidite da se mladići muce, ali neki put ni sreći ili hi blokojo oni ca imajo švik va ustah i bandjerinu va rukah. Neke stvora se moru i z loprana videt. Recejo da je anke partida va paleštre, kede je igro Potpićon, bila namešćena. Si mi manje-više kupimo biljet da uživamo va partide i pomoremo Rudaru, a na finjetke vidite da je neki drugi umešo prsti. Pomoru anke oni na brešćiće vonka kampa, da ne bin hi zobi. Po mojen, najbolje bi bilo da se oni va Zagrebe i okolice zaprejo va svoj kort i igrojo balon met sobon, ošto koko gre napred va Hrvocke jedini nin ne bude nanke do slanića.
Bez kampa morejo igrat kamo god ćejo, a to van je sejno koko da jin va „Nostrome", a plotin va „Calimere". Ki ima šoldi more delat ca će. Bi reć da smo va ten mi Istrijani trdo deboli ili preveć pošteni. Ako niš, na kampe se nasluhamo onega trubadura od Klaudija, ka celo vreme puše va trumbeto i navija sireno koko kad so nekad mini hitali. Muški malo opocino i tu so sigurni da moreju namire popit, magari od mižola od plastiki, tako išće policija. Ženi hi nećeju špotat ošto njih je trdo malo na kampe.
Eko van jedon vic: Prišle so Marija i Tonina poli psihijatra. "Dotor moj, muž mi je veli pijanac". „Na velu žalost tuka ni pomoći", reka je dotor. Tuži se Tonina da joj je muž veli kurberina. „Koliko let ima?", pita dotor. „Deboto šezdeset". „Šinjora moja ni stroha, još malo i to će ga pasat."
TOVARI
Njega će pasat, a koko će pasat siromahi tovari va Donišnice, na Most Raše, još se niš ne zno. Ni vrah da će finit va mortadele. Kad štejete va đornale jedon govori jeno, drugi drugo i saki po svojen ima pravo, a tovari jedini niš ne pita. Za tovari se rece da so joko pametne beštiji. Kad si nešto klodo va glovo jedini hi neće movit nanke koraka napred, pa vervan da se neće movit nanke od Donišnice. Najbolje bi bilo da šjor Knapić i šjor Perko sedno za stol i vibero najpametnejega tovara ka će nin pravit ca bi trebalo storit. Bila bi vela škoda da se ti tovari zataro. Ljudi so se navadili nonje, a oni malo teže na ljudi.
Boškarinah, ki se anke trdo štimojo, se je manje. Vosce i kozi so se reje i koko re napred, od seh beštijah, ostat će najveće beštiji, a to so ljudi. Zato me ne cudi kat mi je jedon reka da je poli Ružić peteh porti od infarkta. Peteši je pet-šest kokoš, skoknu na cok, por puti krepko zakukuriko i tombo se na bok. Ko ne vervate hote poli Ružić i pitajte šloveka. Šetemono don kokoši mu neso znesle nanke jeno joje od dešperiji. Va te vele nesreće jedon je hiti jeno na škerac: iman tako velega peteha da son mu stori mići plug i snjin odoro si trsi. Ovo drugo je šćorica, a ono prvo vera istina.
PAŠALIĆ
Pason po rive va Rapce i cujen da će ribari poć na cesto. Zajno son pomisli da so portili va šofite. Ki je vide na ceste ribi lovit. Plovi dizel saki don krešiva i somi ne znojo koko prit vonka. Zato ne cudi da je riba saki don se draža. Malo cudno, poli nas na markate ima veći preci nego va Zagrebe. Da je more okolo Zagreba, vervan da bi ta plovi dizel bi puno ceneji. Se mi se paro da bi neki političari mogli ses na libret pa bi nin bi malo bliže mozgu. Mesto da pomoro našemi peškadorima, oni pomoro Slovencami i Taljonami, a tuka neki mora imet neke koristi.
Opet jedon vic: Bepo kupeva ribi na markate. „Škužojte, ca so freške te škombri?" „Ca ne vidite da so još žive?" „Moja Marija je anke živa ma ni freška."
Prvo nego ren pisat za izbori, ćun van pravit jeno novo. Son cu da se dotor Pašalić, nekad desna ruka prešidenta Tuđmana, moto po Skitace i okolo nje. Koko so mi rekli, bi reć da kupeva pašo za vosce. Skitacani zalevajte krasi tako će i preci bit veći. On će napravit štali za vosci od „cetire steli" kade će moć i turisti spat.
IZBORI
Ca napisat za izbori kad pride manje od deset posto ljudi votat. Po ten vidimo da je semi puna bareta. Više jedinemu ne vervaju i trdo su dešperani. Da je forši na liste od IDS-a bi Pipica mesto Batelić Darka vervan da bi hi prišlo baren ono ca je falilo do deset posto. Ako mislite da se ni storilo ono ca je obećano samo mi jovite. Neću jedinemu pravit ali ku je maj moguće ću napisat va moje pađine. Saka cos IDS-u i SDP-u ca so dobili najviše glosi, ali ni to ono provo.
Ku niš, mene je drogo da ste se ta put na internete dosta raspisali na mojo pađino. Vidin da vas opet intrigojo neke moje besedi. Neki piše da je „perke" taljonska beseda. Va jeno ruko ima i pravo, ošto to je po njihovo „zoc", a ko se rece „vero" po naše, to je „jer" na hrvocki ili „ošto", po naše. Neću previše kontreštivat, ošto s ten našen zajikon bimo teško prišli na kroj. Pišite ca više, tako ćete i mene pomoć. Ja bin najraj da mi neki napiše celo pađino, a ja ću se samo potpisat.
Koko vajka, za kroj jena šćorica: „Tone moj, kad smo se ženili moja Marija je imela sasci koko dve anguriji. Pokle desetak let koko dve hrušvi, ali su još vajka bile slatke. Sada ima koko dve žbuli." „Ca po vrajže?", rispondi Toni. „Je,.je, kat priden blizu njih zajno mi pridu suzi na oci."
Vi stareji otarite suzi da morete mojo pađinu preštet.
Vaš PIPICA