Pipica Novi foji, broj 65 1.9.2008 13:08

Bolje se prebuć za feštu nego za funerol

Pret mesec i pol smo bili zaštupidani z balonon, sada smo okupani z Olimpijadu va Kine, tako da nam neke stvora pasevaju spreda nosa i ocijah, a mi ne gremo nanke za ten. Ako ne budemo trdo zbujeni brzo će nas noć pojes, forši anke ca drugo. Saka cost Kinizami, ste videli ca so storili. Anke doš ni pada kada će oni. Mušati so trdo lahko regulali. Saki je svojega ćepo i dešvo, tako da hi poli njih više ni.
Son kontro Kinizi ki imaju butego va Labine. Oba dvo skupa nimaju kil koko Benković. Da so oni doli 96 puti krh koko on, bili bi trdo anemiki. Pero on je pol te krvi popi pretelu Baćcu, zato njemu ni teško krh davat dvo tri puti na leto.
Kat son na pocetke napiso da će nas anke nešto drugo pojes, to son pomisli na jeno stvor ka me je krepko trenula. Neki je cu , a neki forši ni, da saki drugi na labinšćine boluje od raka. Ja to ne vervan, ma pero ko je to istina, moremo već sada prontat jeno trdo velo padelo za buzaro napravit. Koliko znon raki hode za nazad, a va čirkole so rekli šinjori Demetlika, Brkarić i Drandić da Labinšćina hodi trdo napred. Lepo je ovo drugo cut, samo ki će na teh našeh krajah uživat ko gre tako napred. Neki vrah nas tošikiva, a od našeh dotori se jedini ni jovi ili napiso joli je to istina ili ne. Neki govore da je se to ot teh veleh kaminah, drugi da je to ot teh vodah ca so pot zemljo va kove, pero jedini ne zno pravit jeno dreto. Bolneh je va šofite, puno hi umire od raka, kolpa i tira va možljeni. Ki će ga znat, forši non je storeno.

FUNERALI
Kat se spametin na besedi ca mi je jedon pametan šlovek reka, zajno pomislin da nan je za sprovega storeno. Ću van napisat ca mi je reka: Pipica moj, je ljudi va bolnice i manikomije kemi ni tamo mesto. Zoc medigi neki put recejo mi smo svoje storili, hote na drugo bondo. Puno je oneh ki neso medigi a morejo van puno pomoć. Na velo žalost trdo je malo oneh ki va to vervajo, a kat gredo već je kasno. Šoldi gredo ku si zdrov a kamoli ku si trdo bolan. Kat malo pogledate više ljudi umre na leto nego ca se dece rodije. Ni dneva da ni funerala.
Kat son već poli funerali jena stvor mi već let poci, pero ne samo mene. Saka cos Komunalnemu kako se lepo organizo. Si ki rejo na funeral se prebucejo va nešto šesneje ko je maj moguće. Tako bi trebalo i Komunalno oni delovci ki pomoro kad se kasa kaliva, obuć va jeno šesno manturo i okolo groba nešto klas tako da ljudi ki kalevajo kaso ne gredo do slanića va blato. Funeral košto lepi šoldi, pa bi se ot tega moglo ca i na bondu klas za to regulat i se bi bilo lepce videt.
Znote ca, bolje se prebuć za feštu nego za funerol. Fala Bogu, teh mesec i pol feštah ni falilo. Bilo hi je na saken korake, magari tri, cetire sejni don. Govori ne, govori, piso ne piso, sejne stvori se trefe sako leto. Ne gre mi va glovo kako se ne rivojo dogonat. Vremena je koliko got ćete, pero, se mi se paro da je oneh ko neso zbujeni ili pak delajo na urto.
Tako da je i Bepo krepko zaspa. Marija ga budi. „Bepo moj, zbudi se, zobi si popit tableto za spat." Bi reć da bi trebalo puno njih zbudit i oce nin otpret, ošto od tega jedini nima koristi. Poli nas je preveć trdogloveh, a kat re co nopak si so krivi samo oni neso.

SANADER I KAJIN
Bijoti naši političari. Sada kat je najviše turisti, donesli so depešo da butegi delajo do devet ur vecer i portili na feriji. Sada kat nin je sunce šviknulo va glovo provevajo nešto kambjat. Ki zno forši so imeli guzico na sunce pa nin je hitilo va glovo. Dok se sprave, leto će pasat a koliko so butižeri zgubili njih nanke mrvi ne briga. Oni so svoje već dobili i još će dobit. Manje više si so portili va Dalmocijo na feriji i bi reć da je to depeša ot Sanadera, ošto nin se Istra omrazila na racun Kajina. Ne daj Bog da ga kontrojo kede na spjađe, zajno bi nin šle feriji vrit. Ko muciš ne valjo, ko receš nešto ca hi ne komodo zajno bi te pojali. Tako i tako non se zamo a tornojo samo petnajs posto. Morete zamislit, doš žene celo ploćo a ona ti do petnajs posto keh moreš špendat za svoj gušt. Vervan da je i tega. Cujete da žena tuce muža, a da stvor bude još lepca, vajka govore, znoš da je ta i ta pustila muža ili mladića, a retko keda je nopak. Bi reć da muški imajo debeleji žihci i pasojo preko nekeh stvorah, a tako nin zostone i cela ploća. Kako got bilo, jeni bez drugeh ne morejo.
Vrime nas dobro služi. Turisti su kuntenti, magari brantoljojo na veli preci va hotelah, restoranah i butegah. Ca bi trebali mi reć na to mižerijo ot ploćah. Na markate hi je malo videt, perke hode va one vele butegi ke so dosta ceneje, magari je verdura na markate domoća i puno zdraveja. Marija ima mićo ploćo, pero ona ca kupi zame na markate. Jeno jutro se je siromaha spuznula na per od indiviji, pala na tlo i raskrecila se. Gleda je Bepo met nogi i govori, tako se i libret otpre na pađino ka se najviše šteje. Tone je bi bolje sreći. Kad je dobi talijonsko penzijo, porti on na por don va jedon malo bolji hotel. Zove on kamaljera da mu donese vecero. Šjor moj, to van je švedski stol. Ni stroha ću se ja stat kat on pride.
Eko tako son i ja priša do kraja. Budite mi pozdravljeni vi doma i vi po svete.

Vaš PIPICA