Pipica Novi foji, broj 67 31.10.2008 8:13
Deca moja, bit će sega i sacega, samo ne bude šoldi
Lepo so nan gonali naši stareji: Deca moja, bit će sega i sacega, samo ne bude šoldi. Kad si mlod, neke stvora ne rivoš kapit, niš te ne boli, misliš da si popi so pamet sveta, a kad te pljehne po glove, spametiš se na besedi ca so stareji gonali.
Na velo žalost se to prideva, ne pomalo, već je na vrotah. Sega je za kupit, a ljudi imaju se manje šoldi. Ti veći su se nakrali, a siromah neće imet nanke holjovi da bi moga kako šoldin spravit za grda vremena. Ne znon ca ćeš spravit, kad se komoć revo od ploći do ploći, a kamoli od penžjona do penžjona.
Forši će nas malo škapulat to ca će butižeri morat kalevat preci, ošto neće imet kemu prodavat. Vervan da za leto don domoće ulje neće bit po sto kun koko sada ošto će nin zagroncovit.
Pride Bepo va butegu i pita butižerku po koliko je domoće ulje. «Po sto kun, ošto to van je ulje verđine». «Znote ca, dajte vi mene jeno razjebeno po kvarnor kun», je reka Bepo.
Žol mi je i našeh ljudi va Merike. Više njih je krepko pomoglo rodbine i pretelami za vreme te zadnje munjene gueri, a sada je forši oneh kemi će trebat njihova pomoć. Dobro da se naši ljudi znoju snoć po svete i za njih se gona da su puno bolji delovci tamo, nego ca su bili doma, pero su bolje i pošteno plaćeni. Jedon pretelo mi gona da je cu za treh ki se prontevaju doma prit, a koliko hi je još, nanke bog ne zno. Nekeh je forši sron ili stroh, ošto ne znojo ca hi tu ceka, pero kad si doma, si doma. Vajka će se noć kakova bukaletica ili dec dobrega vina. Ko je za nas, će bit i za njih, ošto su puno dobrega storili kad je najviše trebalo.
Son bi na boćah, i jedon mi gona da je osandeset i osmega bi na Rabe lecit se od pit, i pokle tega so to vreme ni popi nanke kapi. Ja neson bi tamo nanke sekundi, pa neson celo življenje popi nanke kapi. Polić ili litro ja, pero kap nikad. Poslo me je vrit, ma ne importo.
VIAGRA I CICE
Samo da smo zdravi i veseli, a drugo će prit od sebe. Zadnji put son van piso za novo seks butigo va Labine. Neso nego poceli delat i već so ono seks morali maknut ošto pocu nekemu ka će va te kuće otpret kancelarijo va ke morate poć timbrat sako horto i to plotit. Bi reć da to va naše lepe Hrvotske ne gre skupa. Žalosno, kako gre napred. Ako stojite ozgora ili ospoda takoveh nećete smet nanke brusit.
Znote ka beštija ima najduljega? Moja rodbina, kanadski gusan, kvarnor i dvo centimetra. Ženske moje, takovega va te butege ne nojdete. Bepo ni ime Bog zno kakovo ordenje i za to dignut je treba pomoć. Marija vopi od kamari: «Bepo nemoj zobit popit antisklerin!» «Zoc, Marijica moja?» «Kad prideš va posteljo, da ne zobiš kamo si klo viagro».
Son cu anke jeno za ženske ke pate od tega ca imaju prevele cice. Jena šinjorica mi je rekla da bi trebale pit puno kafe. Znote ca će se pokle trefit? Cice će prit manje, a od preveć kafe će nin se pošnet ruki tres, pa će muški finit prvo nego je poce. Zato je bolje da pijemo manje kafe pa će jedon i drugi imet co ćepat.
Ca so ćepali delovci Cimosa na Dubrove i Ec-Coma na Pjacale. Va sake fabrike preko pedeset delovci je portilo doma, a tuka je anke oneh ki imajo anke fameji doma. Ženske na Pjacale šest meseci neso dobile ploćo, a gospodor od Toliji kupeva palaci. Bi reć da je neki tuka slep ili munjen. Mi hodimo vaingajuć napred. Dvajsti delovci zamo na delo i tuka neso joko sigurni, a sto hi sprave doma. Za oni mlaji je bolje da grejo va školo za menadžeri, ošto oni joko retko gube delo.
Poznon jenega diretora ka je zosto bez delovci i kancelariji, pero ne i bez dela. Kad je priša na delo do kraja dela sede bi va portige od firmi i za to dobivo lepo ploćo. Celo vreme je ceka da pride njegoveh pet minuti. Priša je još veći diretor, a pokle tega je puno od njih vraga pojalo. Danas uživa va trdo lepen penžjone.
ŠKOLA VA STOREN GRODE
Uživala so i deca va Storen grode pedeseteh let, pero škola nin ni preveć hodila. Malo je oneh ki neso baren dve leta va sejno klaso hodili. Neso bili trubasti, pero hrvotski nin je trdo slabo hodi. Ku je reka cavatina mesto patika, drugo leto je mora prit va sejno klaso. Dobro da se je škola zaprla pa je podeštot fini školo na poce. Boh je veli ku bi on bi prvi podeštot ka je priša od Storega groda na to mesto da se to ni trefilo.
Lepo je cut i štet da su Labin i Rabac met prvemi va Hrvotske po lepote i čistoće. Labin je dobi rožicu za drugo, a Rabac za treto mesto. Treba seh trdo pofolit, pocev od Groda, Turističke zajednice, Komunalnega i oneh ki su lepo pocistili okolo svojeh kućah. Ki zno, forši so se oni ki so davali punti štupili, kako more bit toliko zelenjavi i lepeh rožic poret toliko veleh kamini ki dime po celi dnevi. Bi reć da to hita malo teplini va arijo, pa rožice i zelenjava bolje rostejo, a sneg se reje pada.
Za kroj šćorica. «Moran bit atento da ne bin zostala noseća!» «Ja, ma ca nisi zadnji put rekla da ti se je muž sterilizo?» «Jušto zato!»
Imajte se radi i pomorite jedon drugemu.
Vaš PIPICA